தமிழீழ விடுதலைப் புலிகள் இயக்கத்தின் தலைவர் பிரபாகரனின் படத்தை முகநூலில் பகிர்ந்த குற்றச்சாட்டில் பயங்கரவாத தடைச் சட்டத்தின் கீழ் கைது செய்யப்பட்டிருந்த நான்கு இளைஞர்கள் ஏறாவூர் நீதவான் நீதிமன்றத்தினால் பிணையில் விடுதலை செய்யப்பட்டுள்ளனர்.
மட்டக்களப்பை சேர்ந்த சந்தேக நபர்கள் 2020 நவம்பர் 27 ஆம் திகதி கைது செய்யப்பட்டிருந்தனர்.
இவர்கள் முகப் புத்தகத்தினூடாக பிரபாகரனின் படத்தைப் பகிர்ந்ததன் மூலம், விடுதலைப் புலிகள் இயக்கத்தினை மீளுருவாக்கம் செய்கின்றார்கள் என்ற குற்றச்சாட்டில் கைது செய்யப்பட்டு தடுப்புக் காவல் உத்தரவின் பேரில் தடுப்பு காவலில் வைக்கப்பட்டிருந்தார்கள்.
இவர்கள் சார்பில் கொழும்பில் உள்ள மனித உரிமைகளுக்கும் அபிவிருத்திக்குமான நிலையம் இதற்கென சமீபத்தில் நிறுவப்பட்ட ஆலோசனைக் குழுவின் முன்னால் சமர்ப்பித்து இவர்களின் விடுதலையைக் கோரியது.
இம்மனுக்களை பரிசீலித்ததன் பின்னர் ஓய்வு பெற்ற பிரதம நீதியரசர் அசோக டி சில்வா தலைமையின் கீழ் அமைக்கப்பட்ட ஆலோசனைக் குழுவானது மனித உரிமைகளுக்கும் அபிவிருத்திக்குமான நிலையத்தினால் சமர்ப்பிக்கப்பட்ட நூறுக்கும் அதிகமான மனுக்களில் குறிப்பிடப்பட்டுள்ள தமிழ் அரசியல் கைதிகள் பலரை விடுதலை செய்வதற்கு அல்லது பிணையில் விடுவிப்பதற்கு தீர்மானித்திருந்தது. இதன் விளைவாக சட்டமா அதிபர் திணைக்களம், பொலிஸ் திணைக்களத்திற்கும் பலவிதமான பணிப்புரைகளை விடுத்திருந்தது.
இதன் பிரகாரம் நேற்று இவ்வழக்கு நீதிமன்றத்தில் அழைக்கப்பட்டு சட்டமா அதிபர் திணைக்களத்தினால் அளிக்கப்பட்ட அறிவுரைக்கமைய ஏறாவூர் நீதவான் நீதிமன்ற நீதவான் சந்தேக நபரை பிணையில் விடுவிக்குமாறு உத்தரவிட்டார்.
சுமார் 13 மாதங்களின் பின்னர் சட்ட மா அதிபரின் பரிந்துரைக்கு அமைய சந்தேகநபர்கள் நால்வரும் தலா இரண்டு இலட்சம் ரூபா பெறுமதியான சரீர பிணையில் செல்வதற்கு அனுமதி வழங்கப்பட்டுள்ளது.
ஒவ்வொரு மாதமும் இறுதி ஞாயிற்றுக்கிழமையன்று ஏறாவூர் பொலிஸ் நிலையத்தில் கையொப்பமிட வேண்டும் என சந்தேகநபர்களுக்கு நீதவான் உத்தரவிட்டுள்ளார்.